馬賽主場乘「聖」追擊

猪拉多纳

「富豪兵團」巴黎聖日耳門（PSG）今晚喺法甲「國家打吡」出訪宿敵馬賽，進行萬眾矚目嘅榜首大戰，喺呢個最需要球迷支持嘅時刻，佢哋竟然因為波飛套票開價太貴，搞到只得150名Fans隨軍。氣勢輸蝕兼夾狀態麻麻，PSG仲點讓得起平半？今鋪梗係博1.78倍下盤！（開賽時間：周一凌晨3:00）
大幅減價都只得150人吼

馬賽對PSG例牌火藥味濃，自從09年發生大規模球迷鬧事後，法國足總隨後連續3季謝絕所有PSG球迷出訪馬賽觀戰，結果PSG亦輸足3季。本來今季法國足總肯放寬禁令，批准PSG帶400名球迷隨軍出征，可惜由於佢哋開價每張套票盛惠340歐元（約3,400港元），結果幾乎無人問津，到家陣減價至150歐元（約1,500港元）先至話組到150人成團，認真失威。

PSG缺乏粉絲支持，球員狀態亦未達高峰，其中佢哋首席射手、今季已經入咗8球嘅伊巴謙莫域，上周中歐聯屢誤戎機，連佢自己都承認未到Top Fit。更好笑嘅係佢寸到話唔識馬賽中堅尼高拉斯尼古路，要知道呢位喀麥隆兵係當今法甲最佳後衞之一，咁樣畀佢激一激，後者肯定想大打爭氣波！上輪畀華倫西恩斯打破不敗身嘅馬賽，上周中喺歐聯已經極速反彈大勝一場，試問今次主場又點會怕PSG，受讓的確抵玩。