巴塞皇馬冰火大匯演

猪拉多纳

今輪歐洲足球上演多場打吡戰，但重頭戲梗係萬眾矚目嘅西班牙國家打吡──巴塞隆拿主場迎戰皇家馬德里。皇馬依家喺聯賽落後巴塞8分，如果想從後趕上的話，今仗實在不容再失，王牌C朗連續兩場大演帽子戲法，勒都勒唔住，勢必恰死傷兵滿營嘅巴塞後防。不過巴塞有恩尼斯達復出，射手美斯同阿歷斯山齊士亦弗爆，主場出擊一定唔會縮，兩軍火力全開，入球大有買趁早。

（now 632周一凌晨1時50分直播）

「銀河艦隊」皇馬出閘脫腳，頭4仗聯賽只得4分，令佢哋落後榜首巴塞達8分，要衞冕聯賽冠軍難度極高，如果今仗直接對壘中擊敗巴塞，不但能縮短彼此積分差距外，由於西甲係同分先計對賽成績，萬一之後出現同分情況，皇馬便有一定優勢，因此鬥心毋庸置疑。
卡卡回勇艦隊上晒力

事實上，隨住C朗狀態回升後，皇馬成績亦穩步上揚，呢位葡萄牙球星唔單止連續兩仗入3粒，佢近8仗狂轟11球，佢仲好大口氣咁話，今仗一定要擊敗巴塞，以佢咁好勝要面嘅性格，加上近4次作客魯營都有入波，今仗重臨福地，再有士哥唔出奇。其前鋒拍檔賓施馬亦重拾信心，上仗對阿積士仲入咗球靚倒掛，甚至雪藏多時嘅卡卡都復勇，正選後備個個咁弗，教頭莫連奴唔愁入唔到波。

巴塞主場一向鑊氣勁，核心前鋒美斯更係勇達巔峰，今季喺各項賽事已有10球斬獲，近期仲化身助攻王，重新激活沉寂一時嘅法比加斯同阿歷斯山齊士，配合主帥維蘭路華富冒險性嘅戰術，其餘鋒將如韋拿、柏度洛迪古斯、基斯甸泰路亦先後開齋，巴塞進攻遍地開花，連埋恩尼斯達趕及復出，主隊攻力有保證。
佩奧爾倦勤巴塞有窿

不過巴塞有隊長佩奧爾喺上周歐聯受重創，需要養傷8周，另一中堅碧基剛傷愈但狀態成疑，兩位客串中堅馬斯真蘭奴同桑治又多甩漏，令後防有好大隱憂，未必擋得住C朗、賓施馬、迪馬利亞嘅輪流進襲。睇番雙方近年交手，以中位數2.5球計，近8次全部開大，況且皇馬搶分心切，巴塞又攻強守弱，看來今仗入球騷唔會例外，入球大有1.52倍宜趁早入貨。