拉素學精搵着數

猪拉多纳

意甲第7輪，今晚除咗焦點戰米蘭打吡，Ali認為其他前列球隊祖雲達斯、拿玻里同拉素都會把握機會，喺國際賽休戰期前齊齊贏波，今晚投X策略係單頭先捧拉素客勝，再買祖雲達斯串拿玻里贏波二串一。

今晚主力分析場次係佩斯卡拉主場對拉素（周日晚9時開賽），升班球隊佩斯卡拉近3仗2勝1和係威係勢，不過大前仗作客和博洛尼亞，形勢明顯下風，對手浪費大量機會之餘仲要射失12碼；跟住主場面對作客最水皮嘅巴勒莫，對手上半場晨早踢少個，佩斯卡拉最終都係好艱難咁小勝；到上仗作客僅勝卡利亞里，對手一樣有羅錫天尼喺下半場初段被逐。Ali認為佢哋近績好，主因只係夠運同球賽水準奇低。

佩斯卡拉仍然係Ali心目中嘅降班熱門，佢哋擁有具意甲水準嘅球員唔多，兵源十分有限，今場更受到嚴重傷停問題困擾，守將烏路斯哥錫、基斯辛斯、中場摩迪斯度、烏真尼奧托尼因傷倦勤，最慘仲係兩名主力骨幹後衞辛安同中場華迪美韋斯雙雙停賽，另外相當重要嘅中場基斯比哥路斯同祖安昆特路亦有傷上陣成疑，戰鬥力大打折扣，Ali認為佢哋根本搵唔到合適人選頂替兩名停賽球員。
柏高域歐霸輪換等今場

拉素今季傷疲盡起，預期成績會遠勝上季，目前喺意甲排第4位，落後榜首祖記同拿玻里各4分，主要原因係較早前留放出錯，佢哋喺歐霸盃作客熱刺時強陣出擊摸和對手，耗力太多，搞到之後聯賽連輸兩場，不過教練柏高域受過教訓後已經學精，上周中歐霸盃主場對馬里博爾採輪換制收起多名主力，最終小勝1:0，擺明留力呢場搶客Ｗ。拉素係佩斯卡拉今季所遇嘅最強球隊，主隊唔夠砌！
Ali 推介：

拉素勝 ★★★★

祖雲達斯勝 ★★★★

拿玻里勝 ★★★★