紅軍唱熱咪亂篤

sherry

紅軍唱熱咪亂篤
2012/10/07文:蘇豪
英超「蠱惑的槍」利物浦再度登場，經歷季初低潮之後，「紅軍」喺上周聯賽作客狂數諾域治開齋，演出漸入佳境，食住個勢返到晏菲路撲擊史篤城，贏波睇落合情合理。不過，如果咁正路就唔係利物浦啦，佢哋後防唔穩陣，好難頂得住敵軍高空轟炸，冷敲「讓球客勝」！

利物浦出名難捉路，歐霸盃分組賽首戰盡遣副選作客大炒年青人，剛過去周中再戰歐霸盃安排門神連拿、守將格連莊臣及防中祖阿倫等主力打正選，結果反而輸畀烏甸尼斯，捧場客頭都痕！「紅軍」今季喺主場未贏過，今場實精銳盡出求開齋，兩大王牌球星謝拉特同蘇亞雷斯將復任正選，新星史達寧及蘇索等有望落場搏殺，個陣唔使估估吓。

不過，利物浦今次又被捧成一面倒熱門，主Ｗ熱至1.37倍，吸引勁多上盤客支持，無數經驗話畀我哋知，呢個時候要特別提防「紅軍」累街坊！事實上，利物浦本身防線唔多穩陣，教頭羅渣士叫班後衞唔好再犯無謂錯誤，但佢哋今次要應付史篤城空襲，除長人高治外，一到死球仲要應付埋兩大中堅梳爾哥斯同賀夫，非常難頂！

史篤城３將倒戈戰意堅
史篤城上周聯賽主場戰勝史雲斯開齋，中鋒高治包辦兩個士哥，表現醒神，呢個高佬今次聯同查理阿當及奧雲倒戈出戰，一定唔想衰畀班舊隊友睇。史篤城依家愈踢愈硬淨，今季面對阿仙奴同曼城保持不敗，作客車路士捱到尾段先畀A高射死僅敗，橫睇掂睇，利物浦暫時未有頂級勁旅風範，隨時老鼠拉龜，一於博「讓球客勝」！