拜仁省爆賀芬咸

猪拉多纳

拜仁慕尼黑喺歐聯作客巴迪輸1:3，9連勝紀錄被打斷後，教練軒歷基斯同體育總監森馬不和即刻升溫，令人擔心佢哋表現會走樣。不過卡爾萬就認為球員不單唔會受影響，仲有力迅速重拾狀態，返番德甲對住因主力發生意外表現得神不守舍嘅賀芬咸，隨時大勝一場，大細中位數3.5球都一於捧1.85倍入球大。（有線61周六晚9:30直播）
拜仁歐聯輸波更落力

森馬不滿拜仁對不來梅嗰場踢得消極，擔心戰意鬆懈，但軒歷基斯認為森馬有咩應該閂埋門講，擔心球員受太大壓力，其實大家都係想隊波好，只係表達方法唔同啫。

就算拜仁剛喺歐聯被打破不敗身，不過卡爾萬認同軒歷基斯所講：「敗仗未嘗唔係好事，可以當頭棒喝班球員，令佢哋比賽更有動力。」今場拜仁憑住「醒晒」嘅文迪蘇傑、湯馬士梅拿等主力繼續搏殺，加上拉傷肌肉嘅洛賓有機復出，聯賽6連勝入19球嘅氣勢可望持續。
賀芬咸主將撞車 隊友要心理輔導

賀芬咸連贏漢諾威同史特加後成功走出4連敗低潮，可惜上場快車對榜尾奧格斯堡前，中場波利斯胡錫域發生嚴重車禍，成隊波情緒受影響下只踢成0:0。至於波利斯胡錫域經過兩次手術後，情況雖然穩定落嚟，但仲未脫離危險期，就算球會放咗班球員兩日假，啱啱星期二復操嗰陣都專登安排心理輔導員在場，怕佢哋情緒受困擾，班波咁樣對住拜仁邊有得打，隨時係另一次低潮嘅開始。

猪拉多纳

好久没做猪