拜仁「大」起賀芬咸

猪拉多纳

德甲焦點戰拜仁慕尼黑主場對賀芬咸，拜仁剛於歐聯作客白俄羅斯慘敗而回，急需一場漂亮勝仗提升士氣，遇上揚言重新集中精神應戰嘅賀芬咸預期係大手交易，入球大細中位數調整到3.5球照捧大盤。

（有線61台周六晚9時30分直播）

拜仁周中歐聯作客以1比3敗於巴迪腳下，終止了開季後9連勝強勢，今晚矢志要喺主場重拾自信，傷愈嘅洛賓同副隊長舒韋恩史迪加雙雙復任正選，基於踢完今仗將進入國際賽周，無後顧之憂下將傾力爭取大勝發洩。
胡錫域穩定 賀軍求振作

賀芬咸近況本來亦全面回勇，但上輪主場對奧格斯堡之前傳來噩耗，年輕中場波利斯胡錫域車禍命危，令球隊無法集中精神比賽，最終遭對手悶和。賽後會方體諒球員心情，將原定本周一同周二操練取消，畀佢哋陪伴家人同清醒頭腦，雖然胡錫域因頭部重創至今仍然昏迷，但主診醫生表示情況漸趨穩定。教練巴布聲言球隊會同胡錫域一齊重新振作，撇開上仗意外，賀芬咸近期火力甚猛，之前3仗每仗都取得3個入球，不過中場大將沙利荷域上仗領紅牌被重判停賽4場，少咗呢個茅柴擋路，拜仁攻擊手更加可以肆無忌憚發揮。
拜仁上季主場贏7比1

今仗雙方職球員關係密切，拜仁防守中場路爾斯古斯達禾、副選門將史達基同養傷中嘅阿拉巴都曾經効力賀芬咸，至於客軍教練巴布、大勇嘅宇佐美貴史同守將奧查斯都曾在拜仁効力，拜仁教練軒歷基斯同所有球員，賽前亦送上簽名慰問卡，為胡錫域打氣。不過friend還friend，拜仁打賀芬咸從來冇手軟，過去主場4次交手全勝，而且愈贏愈易，前季數4蛋，上季更大炒7個1皮，今晚入球點會少！

好久没做猪