神勇艾達封漢堡蝕本門

猪拉多纳

今晚Oliver祖家球隊漢堡又出場，作客面對格雷特霍夫，漢堡無論質素同狀態都勝一籌，加上有目前全德甲最弗嘅艾達把守最後一關，平手盤捧客軍可封蝕本門。

（周六晚9時30分開賽）

漢堡自從英雄人物雲達華治回歸後，戰績迅即止跌回升，近三仗面對多蒙特、慕遜加柏同漢諾威三強共取得兩勝一和，絕不簡單。

不過如果將功勞盡歸雲達華治並唔公道，皆因門將艾達至係球隊開季至今表現最佳球員，漢堡防線其實仲未執掂，每場波都畀到對手大量射門機會，全賴佢不斷作出多次神級撲救，難怪首席國門紐亞亦識英雄重英雄，呼籲國家隊領隊勒夫重召佢。不過，Oliver相信艾達今晚唔會咁忙，皆因對手格雷特霍夫攻力乏善可陳，每場波開賽時目標都係先求不失，但最終久守必失，今晚唔夠漢堡砌。
周日重心法蘭克福

不過，Oliver本輪出擊重心係周日嘅法蘭克福，佢哋作客對慕遜加柏，係最當弗對最當泵較量，慕遜加柏今季換血失敗，新兵盧克迪莊、艾華路杜明基斯同格列沙加雖然都係高價貨，但現階段根本無法代替已離隊嘅馬高列奧斯、紐斯泰達同丹迪，結果愈踢愈差搞到全隊信心盡失；法蘭克福升班後6戰5勝1和高踞次席，其實佢哋上季喺德乙已經喺每個位置搵啱人選，升班後再補入門將奇雲查普、中場乾貴士同箭頭奧斯恩，各線配合更完美，隊長美亞無論身形、技術同經驗都咁超卓，近兩季長期處於巔峰，Oliver相信佢哋唔係虛火，受讓平半值得捧場。
Oliver 推介：

漢堡平手盤★★★★

杜塞爾多夫讓球勝★★★

法蘭克福下盤★★★★★（周日）