黑貓「大」鬧頹城

猪拉多纳

英超富豪球會曼城啱啱喺歐聯失分，將士們懷住滿腔怒火返英超主場對新特蘭，當然想贏番場振奮士氣，奈何佢哋條防線愈執愈衰，遇着敵軍弗爆射手史提芬費查勁頭痕，「黑貓」仲有翼鋒阿當莊臣倒戈誓打爭氣波，曼城熱Ｗ真係唔多穩陣！兩軍上季喺曼城球場炮製6個士哥，預期今次會再演入球騷，熱捧大盤！

（有線300及200台周六晚7時45分直播）
曼城聯賽場場失波

曼城剛過去周中喺歐聯主場對多蒙特發揮好曳，畀對手快速反擊打到謝，教頭文仙尼近期以年輕後衞拿斯達錫取代尼史葛，佢拍住高柏尼扼守中路效果麻麻，如非門神赫特上晒身左飛右撲，佢哋鬥多蒙特點止失一粒啊！曼城前線4大射手泰維斯、阿古路、迪斯高同巴洛迪利都可候命，火力強勁，但後面始終唔穩陣，今次主場出戰谷前搶攻爭勝，後面大把空位畀人打反擊，佢哋今季聯賽場場都有失波，6戰共失8粒，今仗睇怕都係難保清白之身。
新特蘭彈起未輸過

「黑貓」喺超級教頭奧尼爾帶領下愈來愈硬淨，英超新季5戰未嘗敗績，除咗防守穩健，前面仲識入波添，射手史提芬費查由狼隊來投後突然「升呢」，近4場聯賽包辦5個士哥，腳風順到不得了，大軍兩翼側擊力強，占士麥堅恩同阿當莊臣同樣速度飛快，後者之前喺曼城被投閒置散，今次倒戈出戰必定分外肉緊。另外，新特蘭主將卡達莫要坐波監，缺少呢個硬淨防中，中場破壞力要打折扣，預期一眾守將會受到頗大壓力。

曼城上季主場鬥新特蘭戰況激烈，佢哋踢到下半場初段落後1比3，搏到最後5分鐘先由巴洛迪利同高拉洛夫士哥以3比3逼和對手，執番1分已算好彩。兩軍今次再碰頭，曼城防線出現問題，佢哋級數較高，上周聯賽搏到尾段憑迪斯高士哥搞掂富咸，今次對「黑貓」贏面仍高，但主勝熱至1.17倍冇乜投X價值，投X「讓球主勝」又太冒險，橫計掂計，今場入波唔會少，玩大盤最好！
大盤熱爆

曼城過去3次主場對新特蘭，一共和對手炮製了18個入球，不過馬會今次冇將中位數調高至3.5球，故此大盤熱至1.5倍。除了馬會壓低入球大賠率，塞浦路斯菠菜公司Interwetten都將大盤低開到1.45倍，甚至比馬會更低，似乎對雙方入球能力都極有信心。