皇馬追分大晒

猪拉多纳

今晚西甲「褪色大戰」，皇家馬德里主場迎戰昔日勁旅拉科魯尼亞。皇馬聯賽落後死敵巴塞隆拿8分，要衞冕冠軍不容再失，餘下每場聯賽必然搏盡，雖然皇馬周中歐聯要作客阿積士，但以佢哋食住阿積士嘅壓倒性往績，根本冇需要於聯賽留力，預計今晚主場勢必強攻拉科，考慮到拉科亦有進攻能力，入球中位數調高至3.5球照捧大盤。（now 632周一凌晨1時50分直播）

「銀河艦隊」皇馬內訌問題沒完沒了，繼C朗「唔開心」事件後，陣中「西班牙幫」與「葡語幫」矛盾愈演愈烈，教頭莫連奴為力撐「葡語幫」，竟大肆打壓「西班牙幫」，先係雪藏沙治奧拉莫斯，又批評隊長卡斯拿斯要對曼城的失波負責，搞到球隊內部立立亂，防線難免冇咁穩陣。
拉科防線唔穩陣

好彩「銀河艦隊」前線運作已重上正軌，除季初大勇的希古恩外，C朗腳風亦順番好多，連於歐國盃表現低沉的賓施馬都重拾射門鞋，呢位中鋒唔單止識入波，助攻能力比希古恩更勝一籌，因此C朗拍住佢會踢得更舒服。

拉科雖然實力普通，但今季予人鬥志頑強感覺，中鋒里基老而彌堅，葡萄牙小將尼爾遜米基爾後備入替屢有驚喜，而阿古拿同碧斯後上埋門威脅力大。可惜防線仲要用轉身慢、冇速度的馬真拿，其中路拍檔艾泰美因傷上陣成疑，面對賓施馬、C朗等射手，都咪話唔牙煙。既然兩軍都係有前冇後，看來會合演一場入球騷，大盤有計。
大盤有風吹

馬會今場將大細中位數調高至3.5球，如以同樣中位數計算，外國菠菜公司有立博大盤比馬會為低，根據以往經驗，馬會賠率普遍都比外國公司低，今次出現此情況，似乎外國莊家對今場大盤頗有信心。