祖記二線尖刀劏雌狼

猪拉多纳

跨季44場意甲不敗嘅「意甲超班馬」祖雲達斯，上仗失分畀費倫天拿後，唔多唔少畀人一種跌Watt嘅感覺，不過「斑馬兵團」勝在人腳雄厚，即使派路、基奧雲高同邦路斯等主力今仗極可能休戰，但班後備兵一樣唔嘢小，今晚主場對住防線唔掂嘅羅馬依然可以秤先，2.35倍「讓主」唔怕捧。

（開賽時間：周日凌晨2:45）
保羅普巴有料到

祖雲達斯上仗同「紫百合」互交白卷，開季4連勝走勢斷纜，門將保方坦承兼顧聯賽同歐聯兩條戰線好吃力，所以有消息指看守教練卡利拉今戰會收起派路等主將，改派保羅普巴、伊斯拿同加利亞雷拉等二線兵落場，留力應付周三凌晨鬥薩克達場歐聯。

不過大家唔使擔心，查實呢班所謂後備喺意甲一樣超晒班，保羅普巴係前曼聯新星，曾經被費格遜點名讚佢係史高斯接班人，另外嗰件加利亞雷拉就仲堅，呢位意大利國腳射手去季經歷十字韌帶重創，復出一度遙遙無期，好彩佢今季神奇康復兼逐步重拾勇態，前仗仲入夠2粒添，賽前揚言會繼續入波報答會方不離不棄，鬥心爆棚靠得住。
羅馬場場有失波

唔計早前因卡利亞里違規而被判贏3:0場波，對家羅馬今季喺意甲只係贏過1場咁大把，上仗打多個都仲要畀升班分子森多利亞逼和1:1，門將史基倫堡當然係最大罪人啦，但大家要留意呢支首都球隊開季4戰場場有失波，班守將都有好大責任，最弊係教練薛文唔覺有問題，仲話會繼續派「牛油手」史基倫堡等原班防線人腳應戰 ，今晚聽畀人炒嘞！