鬥牛兵橫行倫敦

猪拉多纳

倫敦打吡爆發！今晚阿仙奴喺主場迎戰車路士，兩支不敗雄師都有挑戰曼市雙雄嘅能力，而且中前場同樣由兩位西班牙球星擔大旗，實力真係不相伯仲，正因為咁，「張峰」認為「兵工廠」個主場因素，分分鐘係勝負關鍵，阿仙奴小讓平半，一於撐1.84倍上盤！

（有線200及300、廣東體育周六晚7:45直播）
兩場大勝地頭威力勁

阿仙奴上仗作客曼城先落後再扳平，戰果算係合理，不過作為球迷就肯定唔收貨，事關曼城喺領先一球後不思進取，搞到戰情沉悶，而且阿仙奴嘅入波機會不斷被謝雲奴糟蹋，如果呢位前法甲射手生性啲，曼城好大機會失晒3分啦！

不過話分兩頭，謝雲奴冇料到、等於10個打11個嘅劣勢底下，阿仙奴仍然交得出咁樣嘅表現，證明班波質素係有，尤其係一對西班牙指揮官阿迪達同辛迪卡索拉非常合拍，助攻助守孭起成條中場線，普多斯基有佢哋傍住，入波容乜易吖？周中佢哋喺聯賽盃出大部分副選，都能夠以6:1炒起高雲地利，早兩仗喺地頭亦以同樣比數炒修咸頓，主場威力超勁，今晚又係時候打老虎喇！
夏薩特見底 桑馬達跌Watt

係，對家車路士季初踢起咗夏薩特，但當各隊都對呢位英超新丁加緊防範後，夏薩特已愈踢愈辛苦，最弊係上季踢到識飛嘅鬥牛兵桑馬達跌晒Watt，佢位同鄉費托雖破到入球荒，但始終無復當年勇，點搞呀？

仲有睇番車仔之前嘅對手，全部都係中、下游球隊，當佢哋喺歐超盃大敗畀馬體會，呢支億萬大軍已見晒底兼狀態回落，上仗英超喺主場踢到飲奶力都出埋，先可以小勝史篤城咋，今鋪作客阿仙奴，睇怕賴嘢喇啩？受讓都唔好制，捧阿仙奴上盤啦！
兩軍下半場未失過波

‧阿仙奴近7次英超主場鬥車路士有6球進帳。

‧車路士同阿仙奴今季聯賽都未試過喺下半場失波。

‧「藍戰士」今季有4場保持清白身，屬英超之冠。
張峰來料：阿仙奴（上盤）

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。