兵車大鬧倫敦

猪拉多纳

英超早場爆發倫敦打吡，阿仙奴主場火併車路士，強強對決、五五之爭，「兵工廠」要讓波，個盤實在唔多抵玩。兩隊剛過去周中同樣喺聯賽盃轟入6粒，大批進攻球員狀態箭嘴向上，個個有火有力，預期今場雙方會對攻，快上快落、士哥必多，入球大屬投X首選！

（有線300及200台周六晚7時45分直播）
阿仙奴近兩主場轟12球

自從9月初作客殺敗利物浦後，阿仙奴愈踢愈有信心，主場惡到暈，近兩次主場出擊同樣以6比1狂數修咸頓及高雲地利，雖然對手唔勁，但兩場轟入12粒都幾得人驚。「兵工廠」放走王牌前鋒尹佩斯後，進攻點愈分愈散，新箭頭普多斯基交到貨，新中鋒基奧特剛於聯賽盃打破入球荒，連謝雲奴同禾確特等人都打起狀態，有晒士哥本錢。不過，大軍連續4場有失波，防線始終存在隱憂，讓波難靠。
車仔「士哥拿」上力

車路士季初主要踢個夏薩特，經過個零月磨合後，中前場新舊球員慢慢進入狀態，貴價巴西小將奧斯卡杜斯山度士已於歐聯騷過射術，球隊啱啱喺聯賽盃6比0大炒狼隊，射手費蘭度托利斯終於入番粒，新箭頭域陀摩西斯亦建一功，前線同樣火力強勁。「車仔」中場林柏特同箭頭史杜列治有傷在身，賽前做過體測先知踢唔踢得，隊長泰利停賽令未實行，可以鎮守後防，但唔易頂住「兵工廠」進襲。

兩支名牌球隊爭做倫敦一哥，近年交手不時上演精彩入球騷，阿仙奴上季作客5比3大勝車路士，屬其中一場經典戰役。雙方近4次喺酋長球場交手開出3大1細，唯一一次開細係上季互交白卷，依家兩隊進攻球員都弗，預期入波唔會少，大盤分頭唔錯，值得一試。
主勝低開

睇番阿仙奴近4次主場對車路士賠率，只有上季次循環賽事主W低過2倍，結果該仗兩隊互交白卷，今次馬會又將主W壓低至2倍，普遍比外國菠菜公司為低，唔通兩隊又有機會握手言和？
阿仙奴近4次主場聯賽對車路士平均主客和賠率

日期 主 和 客 賽果

21/04/12 1.87 3.56 4.08 和0:0

28/12/10 2.64 3.24 2.69 阿勝3:1

29/11/09 2.77 3.20 2.58 阿負0:3

10/05/09 2.68 3.23 2.62 阿負1:4