杜塞爾多夫食住個細

猪拉多纳

周中德甲開快車，第5輪本報拆局9場推介全中。今晚德甲獨腳戲杜塞爾多夫主場挑戰史浩克04當然要乘勝追擊！主隊踢咗5場仍保持零失球，證明防線勁掂，面對有歐聯後顧嘅史浩克繼續頂得住，追1.9倍入球細。

（有線64台周六凌晨2時30分直播）
史浩克有歐聯後顧

升班馬杜塞爾多夫目前以不敗身排第5，而且神奇到仲未失過波，5戰全開細盤，周中作客兩球擊敗格雷特霍夫，防線滴水不漏，全隊目前士氣如虹，今晚面對強敵，當然會繼續以穩為先。

史浩克至今5戰得10分排第4，周中主場3球輕取緬恩斯，但表現一般，大勝純靠質素同對手踢得曳，比賽過程中仲不斷被主場球迷柴台，贏3粒都詐型，足見史浩克球迷要求幾高，但亦因為咁令史堤芬斯同班球員相當冇癮，事隔3日匆匆再戰，加上下周中又要應付歐聯分組賽對蒙彼利埃，相信多個位置會作出輪換，唔去盡下預期今仗作客只求小勝，細盤好路。