山度士爆破智大氹Fans

猪拉多纳

南美超級盃終極戰聽朝爆發，山度士喺主場同智利大學再決高下，呢支巴西勁旅今季喺本土聯賽戰績低沉，想參戰來屆自由盃嘅機會好渺茫，主帥拉馬奴聞到魷魚香，為保飯碗今鋪絕對唔衰得，一於撐有尼馬復出嘅山度士捧盃，要1.85倍主勝。

（開賽時間：周四早上6:00）
智大門神醉駕被捕勢遭雪藏

由去屆自由盃盟主同南球盃冠軍爭逐嘅超級盃，可以話係南美洲球會級別嘅最高殊榮，山度士今季巴甲戰績強差人意，當然想攞番個尾彩補飛氹Fans。咪忘記尼馬上場聯賽坐波監，今鋪抖夠復出領銜鋒線，加上山度士首回合只能同智利大學互交白卷，就係因為呢位「新球王」射失12碼所致，今鋪猛虎出柙，佢肯定想入波將功補過啦！

對家智大喺巴西時間周一下午先到埗，隨即就展開一課閉門操練，雖然佢哋今戰可以「夫添」出擊，弊在門將靴利拉因為上周醉酒駕駛被捕，教練森柏奧利極可能將佢貶做後備。首回合智利大學主場出擊都咬唔入山度士，今鋪易地再戰更加惡踢！
南超盃、南球盃及葡聯盃賽制：

採主客兩回合制，南超盃為決賽次回合，南球盃為16強首回合，葡聯盃為第2圈首回合，若總比數相同，作客入球較多一隊勝出，再和則於次回合後隨即互射12碼決勝。

首回合：山客和0:0