撐西布朗再啅頹爆紅軍

猪拉多纳

西布朗今晚喺英聯盃第3圈坐鎮山楂球場迎戰利物浦，紅軍喺英超「雙紅會」輸畀曼聯後仲未開到齋，加上兩日後又要作客諾域治，頻密賽程兼且狀態唔多掂，相信領隊羅渣士會識得取捨，唔會嘥太多力喺盃仔上面。相反西布朗戰意鮮明，有望挾聯賽主場3連勝氣勢過關，一於要2.8倍主勝。

（開賽時間：周四凌晨3:00）
利物浦留力搏聯賽開齋

利物浦創下成個世紀以嚟最差開局後，睇怕領隊羅渣士只會將專注力放喺聯賽，英聯盃呢啲盃仔相信會繼續以佐敦軒達臣為核心，帶住丹尼爾柏查高、韋斯頓一班生牯仔去搏，但喺上周歐霸盃對年青人場波睇到除咗蘇素表現對辦外，其他紅軍小將明顯未夠火候，如果唔係換入舒維爾同波連尼等人，相信戰果都好難改寫。

主隊西布朗同紅軍就正正相反，佢哋上一圈英聯盃對伊奧維嗰陣，只係作出輕微調動，沙恩朗、羅辛貝治同謝拉等主力悉數上陣，隊長布拉特仲交出咗3次助攻，睇得出佢哋對英聯盃嘅重視，卡爾萬睇好西布朗可以繼英超開鑼戰後再啅紅軍，今場冷敲2.8倍主勝。