雷恩斯減磅Fit番晒 再追西維爾

猪拉多纳

西維爾教練米高有幸福嘅煩惱！隨住雷恩斯同柏洛迪兩名傷兵回歸，米高話西維爾今晚喺西甲作客拉科魯尼亞，手上籌碼太多，根本唔知點出至好。啱啱贏完皇馬嘅佢哋家陣士氣一流，最緊要係曾經被視為天才嘅雷恩斯今季減磅成功，重現佳態，有佢復出孭飛，要贏波話咁易。平手盤梗係再追1.86倍「客勝」啦！

（開賽時間：周二凌晨3:30）

上季尾做完疝氣手術嘅柏洛迪，同肩部受傷抖3個禮拜嘅雷恩斯，上周中開始已經相繼回歸大軍，全面投入操練，西維爾依家全班波都健健康康，米高就連今次出征拉科，都要喺大軍抽起6人唔使去。佢話明相比起對皇馬，今仗會稍作變陣，照估計面對住實力一般嘅拉科，梗會加強進攻博攞3分啦！
柏洛迪復出 米高大把人用

事實上，西維爾嘅實力的確唔曳，除咗有西班牙國腳尼格度、捷西斯拿華斯壓陣，仲有個「落難天才」雷恩斯，淨係呢個鐵三角已經係入球保證。今年初回歸西維爾，表現未達預期嘅雷恩斯，原來喺暑假一直進行體能特訓，體重更由80公斤減到73公斤，據佢個體能教練所講，雷恩斯嘅特長係速度加技術，減磅之後會令佢速度同狀態提升更有利發揮，依家佢終於傷愈，今晚大爆發有乜出奇？

連同上仗砌低皇馬，西維爾喺今季西甲4戰得2勝2和，表現不俗，雖然話佢哋今晚嘅對手拉科，同樣都係4戰不敗，但其實喺近3仗都只係和波收場，唔算係咩突出戰績。何況佢哋個前鋒里基早排比賽整爆鼻，家陣要戴面罩上陣，唔多唔少都會影響演出，箭頭保迪普、沙洛馬奧同守將羅利沙拿比亞又都因傷缺陣，陣容不整，主場隨時1分都攞唔到。