熱刺搏到殘 讓唔起昆士柏

猪拉多纳

熱刺近年一直被認為係可以挑戰「Big4」嘅勁旅，上季仲殺入前4添，不過自從今夏由保亞斯接替夏利列納執教後，熱刺成績不升反跌，開季4場聯賽只得1勝，最慘係保亞斯季前仲賣走班主力球員，好似雲達華治同莫迪歷咁，新買嘅球員又接唔到班，無咗兩大指揮官喺度，隊波梗係立立亂啦！
保亞斯排陣亂晒坑

保亞斯嘅組軍方針真係好難令人理解，重金買咗洛里斯返嚟，又繼續出年過40嘅費度做正選門神，如果佢覺得費度OK，就唔使咁早買洛里斯啦！周中熱刺打歐霸盃，保亞斯又冇留力，唯一識入波嘅迪科爾都要搏殺，球員體力邊有可能咁快復原呀，對住昆士柏有暗湧o架！

係，曉士執教嘅QPR成績唔係話太好，不過佢哋勝在組軍方針明確，今季佢哋買咗朴智星、保辛華、施薩索拉斯同格尼路等即食名牌球員，雖然佢哋打咗4場英超未贏過，不過上仗成功守和車仔，證明班球星已逐漸上力，對住啱啱打完歐霸盃嘅熱刺，有力保住不敗，博2.62倍「讓球客勝」！
微博傳情：期待「BB」出世

早前接拍嘅微電影已經去到尾聲喇，仲差最後一場戲就大功告成！呢部微電影嘅幕後工作人員功不可沒，即使係一個鏡頭，事前都要有好多準備功夫！經過幾場戲後，我哋已經愈嚟愈熟悉大家嘅要求，拍攝得愈嚟愈順利！好期待我第一部微電影嘅誕生！嘻！