利華慕遜駁火做大龍鳳

猪拉多纳

周日頭場德甲利華古遜坐鎮主場迎戰慕遜加柏，啱啱歐霸盃分途出擊嘅佢哋，喺賽前都係被睇好嘅一隊，點知到最後各自「煎雙蛋」收場，令一眾捧場客失望。不過呢個戰果其實亦唔係完全反映到場波嘅真實情況，雙方球員谷住一肚火，今場肯定要搵地方發洩，「雙遜」對碰一於要1.82倍入球大。

（有線61、64及204周日晚9:30）
近6次對賽得1場開細

查實利華、慕遜喺歐霸盃都唔係踢得差，贏唔到只係差少許運仔，利華古遜對米達列斯嗰場中目標射門高達11次，比起對手只有1次中目標，可以睇得出形勢幾咁一面倒。至於慕遜加柏作客AEL利馬素，去到補時8分鐘因對方犯手球獲判12碼，可惜雲特主射中楣底彈出，AEL個龍門仲畀人影到執番身彩後喺度偷笑，可想而知「雙遜」贏唔到的確係好唔抵。

翻查埋佢哋近3季6次喺聯賽對碰，雖然勝和負各兩場不分高低，但要留意當中有5場開出入球大，連開細嗰場都1:1完場，鑊鑊打甩髀。今場利華古遜箭頭傑斯寧同比拿拉比繼歐霸盃再度合作攻堅，加上慕遜加柏嘅艾蘭高、盧克迪莊趁歐霸盃休戰養精蓄銳後復出，雙方肯定要一洩歐霸盃贏唔到嘅悶氣，數據加實況都有利開1.82倍入球大。