松本戰績起「飛」捧1.62倍W

猪拉多纳

雖然弱雞到連專門練習場都冇，但係日乙新軍松本山雅居然愈踢愈好，近8場波只係聯賽、天皇盃各輸1場，今日佢哋主場迎戰尾二嘅鳥取飛翔，1.62倍主W好易開出。

（開賽時間：周日中午12:00）
鳥取飛翔作客7成輸波

松本呢隊波唔係資金雄厚，到家陣都冇專用練習場，下屬嘅青年軍直情要借用中學嘅場地添。不過，呢個城市好支持自己隊波，近排由市長管谷昭出面，研究緊將個單車場同運動廣場，總共29,500平方米嘅地方改咗專用足球場，等松本山雅有自己嘅竇口，雖則單嘢仲諮詢緊民意，但係都睇到當地人係好支持家鄉球隊嘅。

可能因為咁，松本呢期愈戰愈勇，排名由季初嘅尾三，慢慢爬到上13位，叫做接近中游嘞。佢哋嘅主場勝率雖然只得31%，但係對住同級球隊一般都贏到，況且對家鳥取飛翔實在太渣喇，作客落敗率高達71%，係日乙最屎嘅球隊，松本今日要攞晒呢3分唔難。