飛腳止血頂得住紅鑽

猪拉多纳

日職今午上演前亞冠盃冠軍對決，由浦和紅鑽主場對大阪飛腳，原本被稱為「關東‧關西超級打吡戰」，但今季紅鑽翻生嘅同時，飛腳竟然慘變地底泥隨時要降班。不過咪以為紅鑽W硬，佢哋有5年未試過聯賽主場砌低對方，加上飛腳王牌李安度蒙迪拉好番，受讓平半抵捧！

（now633及660台周六下午3:00直播）
紅鑽近5次日職主場未贏過飛腳

衰咗兩季，教練換完又換，紅鑽今季簽入日本國腳阿部勇樹同中堅槙野智章，再搵埋廣島三箭教練柏杜域領軍當堂醒番，現時只係落後榜首嘅三箭2分，今場仲推出創會20周年紀念品吸客造勢添。可惜紅鑽近年畀飛腳食住，甚至試過發生球迷掟雜物攻擊對方擁躉嘅醜事，今場紅鑽球員好容易踢到起火失控，加上爭標壓力大，唔值得睇得太高。

至於飛腳喺教頭西野朗離隊後，季初曾經散晒，最近總算止血，關鍵係搵到踢過馬略卡嘅中場家長昭博回巢，同埋曾經去中東掘金嘅射手李安度蒙迪拉歸隊，帶挈飛腳近6場聯賽有3勝2和1負，即使前鋒佐藤晃大有傷都唔驚，事關飛腳仲有右閘加地亮傷愈復出，近5次聯賽作客浦和有2勝3和捧得過。