禾堡揮霍要交代

猪拉多纳

今日主題係馬加夫，Oliver係漢堡人，就由漢堡講起，漢堡今季成績雖然慘不忍睹，但全市近日仍然為球會125周年會慶活動忙個不休，連多位名宿包括金頭施拉、賀巴殊甚至奇雲基瑾都出番嚟助興，不過Oliver同好多漢堡球迷最感激嘅名宿始終係馬加夫，呢位昔日踢法優雅嘅中場指揮官，球員時代為漢堡贏過歐洲盃賽冠軍盃（1976年）同歐洲冠軍球會盃（1983年），並攞過三次德甲聯賽冠軍，所以即使離開咗咁耐，但佢嘅名字仍然喺好多慶祝活動嘅邀請名單內。

同漢堡一樣感激馬加夫嘅，仲有禾夫斯堡，基於馬加夫喺2009年幫佢哋攞到球會史上第一次德甲聯賽冠軍，呢支有大財團福士汽車支持嘅球會，對馬加夫其後嘅差劣成績隻眼開隻眼閉，仲一直縱容佢繼續揮霍至今添！
09年德甲奪標靠符碌

其實好多德甲球評家都話馬加夫早已Outdated，佢完全冇長遠戰術同用人部署，經常撞手神亂買人，每隔半季轉會窗一開就瘋狂掃貨，次次最少買十幾人，但用人又冇耐性，近兩季好以奧查斯、拿傑、希斯佩加、馬高盧斯、積拉錫同施奧咁，用過兩三場唔滿意就即棄，球隊陣容同陣式經常改變，球員根本無所適從，使咗大錢卻辦唔到大事。喺Oliver眼中，佢09年攞聯賽冠軍都係符碌，當時佢有幸手執處於巔峰嘅進攻三叉戟米斯莫域、加菲迪同迪斯高，根本唔使傷腦筋排陣，每場波由得佢三個喺前面自由發揮，其他八個球員做防守工作，遇啱拜仁處於低潮，就咁做咗禾堡史上嘅最大功臣。
格雷特霍夫未夠班

馬加夫今夏又用咗超過3,000萬歐元擴軍，但球隊表現同成績依然唔理想，即使會方唔計較，都要面臨來自球迷嘅壓力，不過馬加夫喺過去兩季最擅長嘅就係當去到球迷容忍極限時，都能夠刺激球員爭勝心，喺危機中贏番一啲比賽安撫佢哋唔難滿足嘅球迷，今晚禾夫斯堡主場迎戰格雷特霍夫（周六晚9時30分開賽），又係時候做靚條數交代，單憑迪亞高、奧歷同巴斯杜斯嘅個人質素，足以撕破未夠德甲水準嘅格雷特霍夫防線，就算幾唔鍾意馬加夫都好，今場都唔好拗頸，捧主Ｗ。
Oliver 推介：

禾夫斯堡勝 ★★★★

史浩克04讓球勝 ★★★

慕遜加柏讓球勝 （周日）★★★