黑貓搏「錘」下盤要追

猪拉多纳

英超打咗4輪，截至目前為止仲有7隊未贏過波，不過唔可以一刀切話佢哋表現差，尤其係「黑貓」新特蘭，佢哋整體演出其實不俗，而且3場和波對手全都非常惡啃，贏唔到情有可原。度士一直都好欣賞「黑貓」主帥奧尼爾，認為佢係有料教頭，而事實上新特蘭球員平均質素甚高，等閒之輩好難擊敗佢哋，佢哋今晚作客「錘仔」韋斯咸，料可全身而退，有受讓平半之利，下盤當然有計。

（有線302及202台周六晚10時直播）
賽程不利硬仗連場

奧尼爾以往執教李斯特城、些路迪同阿士東維拉，已充分展現佢優秀嘅治軍才能，亦係度士好欣賞嘅一位教頭。上季中佢臨危受命執掌新特蘭帥印，亦成功帶領球隊走出困境。今季理應係佢大展拳腳時候，可惜運氣麻麻，季初賽程極為難踢，頭3場聯賽先要同阿仙奴、利物浦交手，至於作客狀態大勇嘅史雲斯，兩度領先下被逼和，亦十分唔抵。因此新特蘭即使未開齋，但表現已經贏到口碑。

呢種情況下，球員信心不但唔會受損，反而因為谷住道氣，更加會激起爭勝鬥心。新特蘭人腳唔錯，前鋒史提芬費查已有3球進帳，中場卡達莫、防線奧沙及丹尼路斯等人，都具備上乘質素，只要保持鬥志，前景仍然樂觀。
凍結路蘭斷其命脈

至於韋斯咸雖然今季連盃賽，主場3戰全勝，但實際上進攻板斧唔多，而且太過依賴中場路蘭入波及策劃攻勢。以奧尼爾教波功力，當然唔會睇漏呢點，自然會派人凍結佢，以截斷韋斯咸進攻命脈。

再睇埋雙方前季英超兩循環對賽，韋斯咸都係輸波收場，今場要讓波實在有啲唔合理，所以支持下盤對度士嚟講，並唔係一個太難嘅決定。