車仔細好過W

猪拉多纳

車路士喺歐洲超級盃失利後氣勢轉衰，接連於英超及歐聯和波，今輪主場對史篤城再被熱捧，主Ｗ不穩又冇肉！「車仔」貴價新兵奧斯卡杜斯山度士喺歐聯驚世彈起，但對住史篤城條血肉長城絕對唔易𡁻，雙方近4次交手全部開細，預期今仗入波唔多，捧好分頭嘅細盤！

（有線300及200台周六晚10時直播）

為投老細阿布所好，車路士主帥迪馬堤奧決心將熱血足球改造成悅目足球，但並非三幾場就可完成蛻變。大軍頭3場聯賽全勝，全靠新兵夏薩特自編自導自演，不過，呢位球星漸成各隊緊盯目標，愈來愈難搵食。巴西兵奧斯卡杜斯山度士於歐聯梅開二度好搶鏡，返到英超對住史篤城班殺人王冇咁易起到腳，費蘭度托利斯已成紙牌前鋒，難當士哥重任！
爛仔波中場落閘

史篤城今季變咗和波王，開季聯賽連盃賽5戰全和，面對勁旅曼城同阿仙奴同樣守得住，演出相當穩定。史篤城雙中堅賀夫同梳爾哥斯向來殺人如麻，主帥佩尼斯季前由布力般簽入防中尼桑斯，加埋格連韋倫拍住上，喺中場開始逼搶對手，想喺佢哋禁區邊起腳絕對唔易。軍情方面，守將韋堅遜上場對曼城郁「腦殘」巴洛迪利被罰停賽3場，已經放棄上訴。
近4次交手未大過

車路士喺歐超盃畀馬體會打謝，近兩場又贏唔到，今次返主場爭勝決心唔使懷疑，但史篤城絕非魚腩，上季作客史丹福橋25分鐘有富拿被逐，頂到下半場先畀杜奧巴搞掂僅輸0比1，如今「車仔」已無「魔獸」，想破密集防守更加困難。翻查往績，兩隊近4次碰頭全細，結合史篤城近4次作客車路士零士哥數據，「車仔」今場小勝機會較高，推介細盤。