撐紐倫堡 讓得起法蘭克福平半

猪拉多纳

德甲獨腳戲爆發「東瀛打吡」！紐倫堡同法蘭克福兩支奇兵新季起飛，雙方陣中最搶鏡嘅球員必數清武弘嗣同乾貴士，呢對日本同胞今晚交鋒勢成焦點。紐倫堡開季表現硬淨，中場費拿喪父後更主動提前歸隊助陣，團結成咁，今晚有權打破法蘭克福嘅不敗金身，讓平半一於捧上盤。（有線64及204、廣東體育周六凌晨2:30直播）

法蘭克福同紐倫堡分列德甲第2、6位，雙方經過今仗之後都有機會至少坐一晚榜首，不過紐倫堡教練赫基就話唔會諗做「一哥」，3分落袋最緊要。上星期喪父嘅中場費拿，本身獲球會放假處理老竇身後事，但呢位仁兄前日已經回歸紐倫堡大本營展開操練，隊友柏赫特仲話希望以勝利獻畀費拿嘅爸爸，戰意非常旺盛。
清武弘嗣 乾貴士演日本打吡

今場波嘅焦點，就係兩位中場乾貴士同清武弘嗣，呢對日本同胞上輪聯賽都有波入，法蘭克福嘅乾貴士表現夠晒搶鏡，但亨格比利就比較欣賞紐倫堡嘅清武弘嗣，呢位指揮官唔似得乾貴士咁淨係喺左路活躍，而係帶動晒成班波嘅每次進攻，影響力重要得多。
法蘭克福防線唔掂

兩隊德甲奇兵新季都未輸過，驟眼睇法蘭克福3戰全勝好似好醒，但對手只係賀芬咸同漢堡呢啲二流角色，贏波係好應分。反而紐倫堡對住多蒙特同慕遜加柏都搶到分就真係堅嘞！有留意法蘭克福上仗以3:2擊敗漢堡嘅朋友，都會見到法蘭克福條防線係幾流，畀孫弘民同馬素贊臣搞到風聲鶴唳，今次造訪有前有後嘅紐倫堡唔會再咁好彩。