紅軍90後 征服年青人

猪拉多纳

年青人硬撼小紅軍！歐霸盃分組賽今晚開打，英超利物浦喺A組作客瑞士球隊年青人，領隊羅渣士一早講明今場會重用小將，但咁並唔代表佢哋會繼續衰到貼地，喺「小日耳曼軍團」踢到曉飛嘅耶斯爾，拍住史達寧、舒維爾等表現搶鏡嘅後生仔，呢班90後小紅軍有力扭轉不勝局面，小妹力捧2.25倍客勝！

（有線61及201周五凌晨1:00直播）
德國U19「小轟炸機」孭飛

紅軍開咧4場聯賽仍未「開齋」，兼創下101年來最差開局嘅羞家紀錄，同美國老闆反口搞到買唔成前鋒絕對有關，最慘係王牌蘇亞雷斯入球效率低，新帥羅渣士飽受劣績壓力下，今場必須贏番場交代，無奈謝拉特、連拿等老臣子近期冇表現又冇晒火，羅帥要自救，惟有喺青年軍發掘新兵幫手。

羅渣士事先張揚今場會起用今夏來投嘅小將耶斯爾，呢位德國U19嘅王牌前鋒，喺國內有「小轟炸機梅拿」嘅稱號，於德國各年齡梯隊上陣僅27場就射入24球，本月初對英格蘭U19嘅賽事更連入2球兼交出1次助攻，利記要破入球荒，分分鐘要靠佢。
舒維爾媲美謝拉特

除咗耶斯爾外，紅軍陣中一班90後小將亦不比一班「大佬」輸蝕，除咗一鳴驚人嘅17歲快翼史達寧，21歲中場舒維爾亦有技術有膽識，雖然欠缺經驗，但表現唔差得過大跌Watt嘅隊長謝拉特，再加埋難得踢正選嘅佐敦軒達臣、紅軍中場絕對靠得住。至於後防更有2010年美洲國家盃嘅「最佳年輕球員」高亞迪斯鎮守，三線都有睇頭o架！

雖然年青人喺主場嘅戰績唔差，近10戰只係輸過2場，但小妹相信紅軍班後生仔見到史達寧呢個成功例子，必定搏甩髀希望盡快上位，踢番場好波畀領隊同球迷睇，兼為希爾斯堡慘劇最近終獲平反慶祝一番。
紅軍鬥瑞士兵必入波

‧紅軍過往8次對瑞士球會均有取得入球。

‧利物浦近6次對瑞士球隊未嘗落敗，得5勝1和。

‧自1960年起，年青人13次於主場踢歐洲賽，只輸過1場。
利物浦死火敲半場和

利物浦近季出現啞火情況，前鋒蘇亞雷斯空有球技但入球欠奉，令紅軍往往埋門多但冇入波，特別係上半場未入局嘅時候，今場面對主場硬淨嘅年青人，未必可以喺上半場破門，不妨敲1.95倍半場和。

歐霸盃A組