巴塞劏魚腩 誓炒斯巴達賀維帥牛一

猪拉多纳

巴塞隆拿今晚喺魯營球場重新展開歐聯之旅，佢哋喺G組賽事迎戰莫斯科斯巴達，實行炒起呢支俄超勁旅，拋開上屆4強止步嘅慘痛回憶！由於呢場係「維帥歐聯處子戰」，相信班球員會畀足面落力踢番場好波，兼且美斯要數胡力爭蟬聯歐聯神射手，巴塞讓2球都照捧1.63倍「讓球主勝」！（有線62及202周四凌晨2:45直播）

小妹仲記得巴塞上屆喺4強勁唔好彩咁輸畀車路士，佢哋谷埋谷埋成肚冤屈氣，今日終於等到歐聯首戰，梗係拎莫斯科斯巴達出氣啦！而且今場係新帥維蘭路華嘅歐聯處子戰，呢位啱啱喺星期一滿44歲嘅教頭帶領巴塞取得西甲開季4連勝，相信今場即使有佩奧爾同恩尼斯達因傷避戰，喺主場面對實力較次嘅莫斯科斯巴達，都可以輕取對手。
莫斯科斯巴達實力差一截

講起巴塞，當然唔可以唔提連奪4屆歐聯神射手嘅美斯，佢已經為巴塞一隊攻入261球、奪得19項球會錦標及3奪金球獎，「當世球王」美名不脛而走！最恐怖嘅係佢只得25歲，啱啱步入巔峰期，絕對有可能繼續進步，加上佢開季後6場正式賽事已經入咗8球，大有可能打破上季入73球嘅瘋狂紀錄，小妹睇好佢今屆繼續「冧莊」歐聯金靴o架！

唔止美斯狀態大勇，韋拿上場對基達菲嘅單刀入球，亦顯示佢傷愈後，射手觸覺已經返晒嚟，莫斯科斯巴達要抵抗呢條當弗嘅最強鋒線，又真係勉強咗啲嘅，就算客軍收購咗巴西天才中場羅姆路，加埋膝傷初愈嘅西班牙借將袓拉度重披戰袍，但又點同沙維、布斯基斯呢種級數嘅球員比先？怕且今場莫斯科斯巴達都係難逃被劏嘅命運喇！

歐聯G組
巴塞近16仗歐戰主場不敗

‧巴塞近16場歐洲賽主場賽事保不敗，對上一次落敗係2009年輸畀魯賓卡山。

‧莫斯科斯巴達12次到訪西班牙球會，得4勝8負。

‧莫斯科斯巴達教練艾美利近6次領軍（艾美利亞及華倫西亞）造訪魯營全部落敗，12次對巴塞亦未贏過，只得5和7負。
踢法唔急攻撐半場細

巴塞踢法向來唔求急攻，務求以控球消耗對手體力同意志，所以即使大勝，大部分入球通常都喺下半場、敵軍防線瓦解時先出現，尤其依家歐聯分組賽嘅對手唔算太強，為留力聯賽，相信佢哋唔會一開波就喪攻。睇番巴塞近3場聯賽都開「半場細」，上屆歐聯分組賽嘅3場主場賽事中亦有2場開半場細，今場即使敲「地上最強」最後大勝，亦不妨補多注1.87倍嘅「半場細」。
歐聯賽制

32支球隊分8組進行雙循環分組賽，每組首、次名晉級16強，第3名則轉戰歐霸盃。
南球盃賽制

採主客兩回合制，今輪為第2圈次回合，若總比數相同，作客入球較多一隊晉級，再和則於次回合後隨即互射12碼決勝。
葡聯盃賽制

採主客兩回合制，今輪為第2圈次回合，不計算作客入球優惠，總比數打和就於次回合後隨即互射12碼決勝負。
中冠盃

24支球隊分8組進行雙循環分組賽，每組首名晉級8強淘汰賽。