PSG辛尼特豪爆登場

猪拉多纳

今夏歐洲轉會市場大豪客並非球迷一眾耳熟能詳的球隊，反而是法甲巴黎聖日耳門（PSG）及俄超辛尼特。聖日耳門今夏投入1.5億歐元（約15億港元）增兵，大牌球星伊巴謙莫域等紛紛來投。過去兩季俄超冠軍辛尼特於轉會窗關閉前突然出手1億歐元（約10億港元）撬走波圖巴西中鋒侯克及賓菲加比利時中場韋素，頓時令球迷注視這股歐洲球壇新興力量。今夜歐聯分組賽PSG同辛尼特分途出擊，正好讓球迷重新審視這兩股新勢力。
聖日耳門谷起炸「基」

法甲富豪球隊聖日耳門於歐聯A組主場面對烏克蘭球隊基輔戴拿模。聖日耳門季初表現雖令人有點失望，不過自踏入9月後已重拾正軌，聯賽連贏兩仗士氣如虹。今仗對手基輔戴拿模作客表現未算太好，加上實力與聖日耳門的確有距離，客場出戰相信凶多吉少，捧聖日耳門主場響頭炮。

（周三凌晨2時45分開賽）

聖日耳門自獲得卡塔爾國家投資機構注資後，隨即成為當今最肯使錢的歐洲球會，今夏更一口氣簽入伊巴謙莫域（2,300萬歐元）、堤亞高施華（4,200萬歐元）和拿維斯（3,000萬歐元）等意甲兵，陣容強勁足以應付聯賽歐聯兩條戰線。
基輔作客腳軟

不過，聖日耳門開季戰績未如理想，首3場聯賽皆未能贏波，其中兩場更冇波入，令一眾球迷懷疑球隊是否雷聲大雨點小。幸好，聖日耳門踏入9月後即於聯賽連勝兩仗，前鋒伊巴謙莫域兩仗皆有入球，盡顯射手本色；其他新加盟球員亦逐漸建立默契，球隊真正實力開始顯露出來，相信之後的賽事會愈踢愈順。

基輔戴拿模近年於歐洲賽表現一般，球隊今夏雖重金收購米基爾維洛素和卡蘭積卡等猛將，但於歐聯外圍賽表現未算太理想，加上對上3場作客賽事輸兩場，可見客場出戰腳仔軟。基輔戴拿模作客遇上狀態逐步回升的聖日耳門，爆冷機會甚低，一於捧聖日耳門歐聯主場旗開得勝。