皇馬星戰屠城

猪拉多纳

新一屆歐洲聯賽冠軍盃今晚揭開戰幔！呢項歐洲球壇最高榮譽賽事獎金豐厚，32支來自17個國家嘅強隊列陣分組賽，為名為利勢必爭崩頭。其中最受矚目嘅梗係死亡D組，西甲班霸皇家馬德里主場迎戰英超暴發戶曼城，雙方人腳總值11億歐元（約112億港元），連主帥莫連奴同文仙尼都星味十足，呢場大戰好睇過戲，但曼城始終輸經驗，作客巴拿貝好難全身而退，皇馬主勝值得捧場。（有線61及201台周三凌晨2時45分直播）
莫帥棋藝勝文仙尼

講得係死亡D組，當然唔嘢小，皇馬、曼城、多蒙特同阿積士全屬上季國內盟主，實力唔會差太遠，爭出線一定要施展渾身解數，激戰可期，但以今場嘅皇馬同曼城秤先少少。作為歐聯奪冠次數最多球隊，皇馬已經10年未嘗呢項錦標滋味，既然上季喺西甲打破巴塞壟斷，球隊上下都想更上一層樓，第10次登上歐洲之巔，鬥心毋庸置疑。

曼城貴為新興豪門，當然想喺歐聯取得好成績，不過該隊經驗上略遜一籌，咁蹺兩軍主帥文仙尼同莫連奴，都曾經教過國際米蘭，前者帶領國米雖橫掃意甲，偏偏幾次出戰歐聯都窩囊出局，亦因此被炒。相反莫連奴08年接替文帥後，不但繼續稱霸意甲，仲於兩年後勇奪歐聯，執教功力高下立見，單計臨場調兵遣將能力，比起老謀深算嘅「寸王」，文帥實在太過保守，應變又慢，就算有鑽石陣容都冇用。
曼城防線執極未掂

其實兩隊近況都麻麻，不過皇馬氹掂「唔開心」嘅王牌C朗拿度留隊，總算穩住軍心，其拍檔希古恩亦着晒火，至於新加盟嘅克羅地亞中場莫迪歷火速融入球隊，可謂如虎添翼。相反曼城今季防線極度不穩，近5仗失咗8球，仲係場場都有失波，明顯係唔夠集中力，而且剛傷愈嘅「腦殘」巴洛迪利狀態未弗，加上文帥作客過於求穩心態，反而會畀皇馬一開波就佔盡優勢食住上，想唔輸都難，簡單要個主勝，博「銀河艦隊」重返勝軌。