貝迪斯3箭「大」戰剋星

猪拉多纳

今晚西甲華拉度列喺主場迎戰貝迪斯，主隊有「貝迪斯剋星」查維亞古艾拿壓陣，客軍亦3箭齊發鬥攻，一於敲2.02倍入球大！

（開賽時間：周二凌晨3:30）
華拉度列靠古艾拿食胡

今場波嘅焦點人物，肯定係華拉度列嘅前鋒查維亞古艾拿，佢喺上兩季西乙夾埋入咗42球，而且喺2010至11年嘅西乙球季，華拉度列喺兩輪賽事都以1:0擊敗貝迪斯，就係靠呢位29歲射手一箭定江山！更有趣嘅係貝迪斯今夏本來接近成功收購查維亞古艾拿，點知兩間球會臨尾傾唔掂數，搞到貝迪斯今晚又要面對呢個心腹大患。

論火力，貝迪斯都唔弱，佢哋鋒線有2場入3球嘅佐治摩連拿擔大旗，魯賓卡斯度、普素路又都已經開晒齋，貝迪斯3箭齊發，今場實行同華拉度列鬥攻玩大佢啦！