豪門曼聯忌爛頭蟀韋根

猪拉多纳

偷得浮生半日閒，去到費格遜呢個級數，梗係冇問題喇，專登擺低球隊繁瑣雜務，走去睇美網捧鄉里梅萊場，總好過由朝到晚煩住曼聯嘅傷兵問題，今晚喺奧脫福對住近況不俗嘅韋根小心又多幾件十字軍。
「護級專家」上季連贏紅魔阿仙奴

「紅魔鬼」有幾巴閉真係唔使多講，但係韋根由上季尾到依家嘅表現，確係值得大家為呢隊護級專家鼓掌！佢哋喺上季英超最後11輪贏7場，起死回生唔使降班，最經典係連贏曼聯同阿仙奴，之前一次能夠咁勁連砌呢兩隊班霸，已經要數到10年前嘅修咸頓。

踢出信心嘅韋根，呢季表現雖然中規中矩，但成班後生仔搏到盡絕冇欺場，豪門球隊有時好忌呢啲爛頭蟀，尤其係曼聯喺國家隊比賽日之後，例牌又添傷兵，兼且要應付下周中歐聯同周末撼紅軍嘅大戰，所以老費都幾頭痛點樣排陣，希望佢哋唔會好似上季咁畀韋根搞亂檔攤3分全失啦！