巴塞攰爆咬唔入基達菲

猪拉多纳

3戰全勝錄得自1997年以來球會最佳開季成績嘅巴塞隆拿，今晚喺西甲作客乘勝追擊基達菲，贏波走勢卻隨時會被終止，事關佢哋陣內唔少星級國腳都踢完國際賽返嚟攰到死，未必交到貨。加上基達菲係名副其實巨人殺手，上輪贏過皇馬，上季都砌低過巴塞，依家「地上最強」讓波，寧願冷敲3.75倍「讓球主勝」好過！

（now632台周日凌晨2:00直播）
「小白」A山都傷晒

巴塞實力有幾強唔使力奇多講，但問題係實力強就贏梗的話，呢個世界仲邊有窮人先！老實講，巴塞今晚唔係冇隱憂o架，佢哋大部分主力都係啱啱踢完世界盃外圍賽，左飛右飛先趕返嚟西班牙，跟住又要作客去馬德里鬥基達菲，話唔攰就呃你啦！

再者，巴塞今仗會有進攻主力恩尼斯達、阿歷斯山齊士同正選左閘佐迪艾巴因傷病缺陣，據聞「小白」個位會由法比加斯頂，呢個前阿仙奴隊長今季狀態麻麻，落佢未必幫到班波。至於話後防重心佩奧爾同中場新星堤亞高艾簡達拿雖然傷愈候命，但同樣狀態未足，與仍未操起嘅射手韋拿一樣，幫唔到隊波幾多。

基達菲呢邊，上仗贏皇馬表現冇得彈。球隊穩守突擊踢法出色，再次剋死巴塞唔出奇。上季佢哋喺主場贏過巴塞、華倫同馬體會，喺自己地頭真係惡過老虎，今晚受讓抵博o架！