季初唔弗進攻太集中 皇馬冇作維

猪拉多纳

一向係西甲惡爺、遇強愈強嘅西維爾，今晚喺聯賽主場迎戰皇家馬德里，主隊新季未輸過，加上「銀河艦隊」受國際賽後遺症影響，嚟緊又有歐聯跟尾，估計未必話贏就贏，2.35倍「讓球主勝」值得一試！

（now632台周日凌晨4:00直播）

每逢國際賽檔期之後，總會有啲球會領隊同教練牙痛咁聲，畢竟足球比賽難免令球員出現傷疲情況，好似皇家馬德里、巴塞隆拿同曼城呢啲大球會咁，一到國際賽檔期，留守喺球會嘅球員都係得番小貓三、四隻，眼見大半隊波球員去咗為國賣命，主帥們往往求神拜佛，自己班兵唔好傷，唔好賴所謂嘅「FIFA毒」！
西維爾土炮鋒線夠搶鏡

皇馬喺西甲開鑼之後踢咗3場，勝和負各一，唔多唔少反映呢支「銀河艦隊」季初狀態尚未去到十足！睇番幾個聯賽入球由C朗同希古恩兩個包辦，佢兩個係好嘢，但「張峰」就覺得一隊波，進攻太過集中喺一、兩個球員身上並唔係好事，尤其係一隊擁有賓施馬、迪馬利亞同奧斯爾等球星嘅巨型班，就更加唔多健康喇！與此同時，嚟緊歐聯分組賽開打，心頭高嘅皇馬主將C朗大戰當前，區區一場聯賽會唔會搏到盡呢？！「張峰」真係有啲懷疑。

西維爾開季3戰1勝2和，表現唔算好標青，但重用土炮嘅鋒線表現就博得擁躉們掌聲，其中捷西斯拿華斯同雷恩斯演出都好搶鏡，講真吖！開季前冇走到，唔代表轉會市場重開後唔走，為「錢」途着想，西維爾球員點都把握機會騷吓料，今場有晒天時地利人和，仲唔做嘢等幾時？主場受讓，「讓球主勝」唔捧就走寶喇！
皇馬作客對賽旺開6:2

‧近4季聯賽8次對碰，總共開出7大1細。

‧雙方近10次對賽，皇馬獲得8勝2負成績。

‧皇馬近2季聯賽作客西維爾均贏6:2，開出「客其他」波膽。
張峰來料（讓球主勝）

日之泉JC晨曦主力兼港腳張健峰，擅打左中場及左後衞多個位置，除了罰球有一手，最拿手係推介歐洲足球。