杜塞爾多夫守細到加

猪拉多纳

每逢國際賽後，返到各大聯賽貼波難度都會提高，尤其季初，原本好多球隊狀態未到位，但有兩星期休整重新準備，隨時會有煥然一新演出，所以今晚黑柴同我嘅德國戰友Oliver都選擇玩大細，黑柴首選係史特加主場對杜塞爾多夫，預期係典型低比分賽事，推介2.05倍入球細。

（周六晚9時30分開賽）

杜塞爾多夫闊別德甲15年後回歸，季前大換血，八成升班功臣離隊，今夏一口氣引入接近20名球員，係名副其實嘅新軍，仲要係全德甲球員身價最奀一隊，根據《轉會市場》網站估價總值只有2,520萬歐元，31名一隊球員加埋都平過今晚喺拜仁做後備嘅洛賓，不過呢支新軍喺四眼佬教練洛拔美亞手上卻玩出魔法，開鑼首戰即作客爆冷贏奧格斯堡2比0，跟住主場0比0守和勁旅慕遜加柏，至今2戰得4分仲未失過波。佢哋防線組織嚴密之餘，仲好聰明咁用破壞足球打亂對手進攻節奏，上仗搞到慕遜加柏愈踢愈差，黑柴睇緊場波已經好肯定咁講，就算再畀多一倍時間慕遜加柏攻，都未必入到佢哋波。
史特加伊比斯域缺陣

史特加至今兩戰皆北，今晚主場對升班球隊當然有開齋壓力，不過主力箭頭伊比斯域停賽，要知道伊比斯域自加盟史特加後除肩負入球重任外，亦憑全面踢法、勤於走動同無私精神串連球隊整條鋒線，今仗喺佢缺陣下，史特加隨時會重蹈慕遜加柏愈踢愈急覆轍，好難咬得入杜塞爾多夫。