小倫敦打吡捧車仔

猪拉多纳

喺隊際運動中，「1+1」絕非等於2，有球星壓陣，球隊表現唔代表一定好。英超昆士柏流浪（QPR）本季大灑金錢，收購朴智星、保辛華、羅拔格連等一班球星，但踢落毫無章法，實際戰鬥力曳到震，今輪聯賽鬥車路士雖有主場之利，相信都只係螳臂擋車，簡單捧客W。

（有線302及202台周六晚10時直播）

今場英超可謂話題多多，除咗係「小倫敦打吡」外，泰利再遇安頓費迪南亦係球賽焦點所在。去季二人爆發「種族歧視風波」，事件搞到上法庭，亦令安頓大佬里奧費迪南唔止同泰利割席，甚至同艾殊利高爾都冇偈傾，安頓已表明今仗賽前唔會同兩個死敵握手。
或全隊拒同泰利握手

另外，QPR其他球員都好撐安頓，昨日更開會研究，以決定會否全體球員都拒絕同泰利揸手。場外冇錯係火花四濺，但講番場波就確係強弱懸殊，以車仔嘅實力應可以撞瓜主隊。

QPR有富豪老細撐腰，除搵嚟曉士執教外，本季大肆擴軍，新近仲買埋格尼路同前國米門將施薩索拉斯，但班波一來未夾，二來活力曳，可謂攻又唔得守又唔得，難怪開咧3戰不勝。

反觀車仔聯賽3場贏晒，氣勢如虹，上場歐超盃係畀馬體會大炒，但踢聯賽同盃賽係兩回事，車仔調整好心態，力足輕取對手，細鬼對客勝充滿信心。有人話下周中車仔會喺歐聯主場對祖記噃，唔怕留力咩？我唔擔心，因為歐超盃輸得太大鑊，要交代嘞！