施多夫孭飛保地花高有體頭

猪拉多纳

巴甲近年愈來愈有星味，除咗有朗拿甸奴等森巴球星回流之外，連歐洲球星都去當地搵食，阿King所講嘅係施多夫。呢位荷蘭名將今季加盟保地花高，風采依然，頻頻有波入，非常犀利。保地花高喺施多夫擔大旗之下，走勢凌厲，取得三連勝，今仗主場小讓國際體育會平半，力捧上盤。（周五早上8時開賽）
國體會陣容不整

以往好少歐洲球星去南美洲球會搵食，除咗因為當地待遇較低之外，踢法亦有好大分別。施多夫真金不怕洪爐火，雖然已年屆36歲，但應付巴甲賽事仍然綽綽有餘，經常為隊友製造入波機會外，自己亦已有四球進帳。另外兩位中場安達仙奴及艾傑臣更合共貢獻咗十六個入球，保地花高擁有一條黃金中場，難怪成績蒸蒸日上。

至於國際體育會雖然有射手李安度達美奧踢完國際賽歸隊，但中場古拿素及前鋒科蘭仍然缺陣，兩位後衞尼爾及法比斯奧施華停賽，陣容不整。而且球隊近四次作客未贏過，受讓都唔抵玩。
甘美奧主場炒「紐」

另一場巴甲，甘美奧今季聯賽主場勝出率超過八成，近八次主場出擊贏七場，今仗喺自己地頭炒得起紐迪高，要讓球主勝。英甲奧連特主場對賓福特，客軍狀態不俗，但作客讓波有暗湧，考慮到賓福特近期入波同失波都多，要入球大。