南韓單箭反「克」攻細唔慌多

猪拉多纳

作客、場地又爛、仲要用李東國打單箭頭，南韓今日响世盃亞洲區外圍賽A組客戰烏茲別克，想大勝一場未必咁易，都係博1.57倍入球細算嘞。

（now671及672台周二晚9:00直播）

呢期嘅「太極虎」畀韓國傳媒形容為「最強國家隊」，佢哋喺A組兩戰全勝帶頭不特止，仲省入7球而僅失1球，的確係威係勢。不過，主帥崔康熙就超謹慎嘞，賽前猛練「4231」陣式，寧願用李東國打單箭頭，反而將朴主永貶咗落後備。南韓傳媒分析，崔康熙咁做，除咗對朴主永嘅狀態存疑之外，最重要係求穩陣，屯重兵喺中場，希望先求立於不敗之地，然後靠李青龍、李根鎬、金甫炅後上搵食，其中金甫炅最得崔Sir歡心，大讚佢比同齡嘅朴智星仲勁，夠晒料取代養傷嘅具滋哲响中場發辦。
烏茲別克爛地考起強隊

之但係，剛啱換咗前國腳卡斯莫夫揸旗嘅烏茲別克，家陣喺A組仲未開胡排第4，今日主場再失分嘅話，出線難度極大，所以全隊上下都話要鍊盡搵「太極虎」祭旗。其實烏茲別克都唔係冇攞分條件，佢哋個爛場考起唔少亞洲強隊，舊年日本去到都只能夠打和1:1放低1分，而且踢過水原藍翼嘅前鋒格恩里克好熟韓國波，實會過料畀啲隊友，韓國仔想炒起佢哋好難。

亞洲區A組