英格蘭時細造英雄

猪拉多纳

世界盃外圍賽歐洲區H組賽事，「三獅兵團」回師溫布萊主場迎擊烏克蘭。英格蘭首戰大炒摩爾多瓦贏盡口碑，但由於對手太弱，戰績根本唔可以作準！英軍前線續殘陣，剛上位的湯卡華利及阿歷士張伯倫將繼續孭重飛，面對防線較硬淨的烏克蘭唔易踢，兩國今年喺歐國盃決賽周碰頭時英軍小勝一粒，今次有機會歷史重演，可捧入球細！

（now 632及100周三凌晨3時直播）
狂炒摩國未受考驗

英格蘭分組賽首戰作客輕取摩爾多瓦，贏在個頭開得靚，開波3分鐘已憑十二碼先開紀錄，全場順風順水，基本上冇乜受過考驗。英軍首戰發揮唔錯，中場湯卡華利成功串連攻守，「雙特」謝拉特同林柏特位置冇乜重疊，中場踢得好機動。不過大家要記住一點，英格蘭首戰對手只是摩爾多瓦，一支歐洲四線弱旅，戰績參考價值唔高！

英格蘭今仗續有左閘艾殊利高爾養傷，替工巴尼斯上次踢得唔差，左邊防守力冇乜減弱，另外中堅泰利亦未必踢得，或改由加利卡希爾拍尼史葛，影響亦唔算好大。前線方面，大軍缺少朗尼同安祖卡路爾，主帥鶴臣上次搵迪科爾打單箭頭，阿歷士張伯倫喺旁邊幫手，火力唔算特別勁，加上禾確特臨陣傷出，鶴帥只能揀紅軍個17歲左翼史達寧入伍，令攻力弱上加弱，若然烏克蘭專心死守，英軍唔易撕破對手防線。
歐國盃碰頭有辦睇　

烏克蘭進入後舒夫真高時代，前線由耶莫蘭高擔大旗，呢位年輕箭頭頗具潛質，但把握力同「軍刀」仲有一段距離，以球隊現時攻力，客場出擊埋門機會有限。烏克蘭對上三戰一球都入唔到，包括喺歐國盃對英格蘭輸0比1，今次情況同樣唔樂觀，但英軍主勝賠率偏熱唔抵玩，預期入波唔多，可留意細盤。