幼獅發「威」撐1.77倍「主勝」

猪拉多纳

英格蘭U21主場迎戰挪威U21，呢場波關乎U21歐國盃H組出線席位誰屬，英格蘭暫時領先次席嘅挪威2分，今場和波就可以出線，不過班幼獅之前7場分組賽入咗23球，火力非凡，信佢哋今場照去盡捧「讓球主勝」。

（now633台周二凌晨2:00直播）
挪威土炮生牯仔唔夠班

火力驚人嘅幼獅上場雖然只係贏魚腩阿塞拜疆兩粒，但咪忘記當時係踢人造草，睇番佢哋對上3場主場分組賽，夾埋射入15球1粒波都冇失過，證明返到地頭出戰唔係人咁品。英格蘭U21除咗由有份踢倫奧嘅蘇杜爾、丹尼路斯幾個球員孭飛外，「恩斯仔」湯馬士恩斯今季喺黑池亦踢到曉飛，嚟到國際舞台肯定搏盡繼續爭上位，加埋舒維爾同佐敦軒達臣等骨幹，默契同實力都超晒班。

挪威U21靠住整體打法成功躋身H組前列，但除咗奧丹斯嘅馬古斯柏達臣同飛燕諾嘅星治幾個外流球員似啲樣外，其餘大多數都喺國內搵食，同喺英超、英冠打滾嘅幼獅完全唔啱班，今場輸兩粒相信係最低消費，一於博1.77倍「讓球主勝」。
賽制

現為分組賽階段。賽事分10組角逐，採雙循環主客制，每組首名及4支最佳成績的第2名，將進身附加賽。