鳥取貪盃「泉」力以赴

猪拉多纳

呢個世界，冇規定護級球隊一定要放棄盃賽，伯明翰都可以拎完英聯盃先降班啦係咪？鳥取飛翔今日喺天皇盃第2圈主場對草津溫泉，賽前教練吉澤英生話明希望贏波催谷士氣，仲可能安排養傷兩個半月嘅10號實信憲明復出，受讓不妨吼實1.83倍「讓球主勝」。

（開賽時間：周日中午12:00）
10號仔復出鬥草津溫泉

鳥取近6場聯賽得1勝1和4負，距離護級安全線1分咁大把，但教練吉澤英生好老定，佢暗示收到高層柯打，至少要連續兩年躋身天皇盃第3圈至算交到貨，所以就算鈴木伸貴、柳樂智和同藤本修司要養傷搞到防線唔夠人用，佢都話要全力爭取晉級，希望踢番場好波氹球迷開心。

假如話吉澤英生打算留力聯賽護級，似乎講唔通，因為剛啱康復嘅中場實信憲明，近日全面復操，據講好可能喺今場比賽落場，對家草津最近有中場必然正選熊林親悟受傷，加上近3次對賽得1和2負，真係未必得低對手，唔好忘記，上個月草津連射手阿巴奧都放走埋，就算連續5場不敗都咪高估。
天皇盃賽制

今輪為第2圈，以一場過分勝負，若法定時間內打成平手，則需加時作賽，再和就互射12碼決勝。