蘇格蘭穿窿

猪拉多纳

世界盃歐洲區外圍賽A組賽事，蘇格蘭喺主場迎戰塞爾維亞。蘇格蘭一向係「地頭蟲」，之但係佢哋未開波已有3件守將打柴，面對有「黃金防線」嘅塞爾維亞強攻不成隨時輸凸，一於揀塞軍受讓嘅1.53倍「讓球客勝」。（開賽時間：周六晚10:00）

蘇格蘭上屆歐國盃外圍賽，除咗喺主客兩輪都輸畀最終捧盃嘅西班牙，其餘3仗主場戰共攞到7分，相反作客就只係得1:0小勝列支敦士登同被立陶宛悶和0:0兩仗搶到分，名副其實「地頭蟲」，又好難怪嘅，班波質素唔掂，咪靠球迷同鬥志搭夠囉！
塞爾維亞黃金防線靠得住

不過蘇格蘭今晚個如意算盤未必打得響，事關除咗丹尼霍斯同羅素馬田2位防線大將退隊，補選番未踢過國家隊嘅保羅迪臣同埋加利麥肯齊外，啱啱佢哋陣中又傳出單壞消息，原來些路迪鐵衞梅古打埋柴，要補選布里斯托城嘅李察科士打頂上，條防線霎時間面目全非，點搞呀？

對家塞爾維亞雖然有尼曼查維迪退役，但係有啱啱彈起、外號「維迪二世」嘅拿斯達錫補上，配合伊雲洛域、蘇保迪同高拉洛夫等名將合組「黃金防線」，梗係固若金湯啦！蘇格蘭只係靠查理阿當、占士摩利臣喺中場策動攻勢，呢班人腳法又麻麻，隨時愈壓愈上，被塞爾維亞穩守突擊偷到雞都唔奇o架！

歐洲區A組
蘇塞半場旺開細

‧兩軍近10場主場及作客賽事，半場入球大細同開出3大7細。

‧塞爾維亞近10場作客戰，總共開出2大8細。