後上前鋒本田弗到漏 日本「W」得

猪拉多纳

世盃外圍賽亞洲區10強賽即將再開打，日本今晚喺新潟主場搵阿聯酋踢熱身賽，擺明當對方係外圍賽對手伊拉克咁砌，邊有可能留手？淨係教頭沙哲朗尼下令閉門備戰，就知道呢場唔係講玩，加上本田圭佑「Top下君臨」（擔任後上前鋒狀態大勇咁解），「讓球主勝」抵追！

（開賽時間：周四晚6:20）

可能香川真司轉會曼聯，刺激到本田圭佑嘅好勝心，佢喺10強賽前改着4號波衫，結果重生真正成為日本國家隊話事人。賽前教練沙哲朗尼保證，今場本田會繼續出任最擅長嘅位置後上前鋒，意味香川真司要繼續做左邊鋒，原因好簡單，因為本田喺10強賽對阿曼先開紀錄，跟手對約旦連中三元勁到爆！
阿聯酋教頭首次領軍

咁都唔止，最近本田圭佑成為莫斯科中央陸軍「Top下」首選，不斷有入球同助攻，加上佢講過夢想係加盟皇家馬德里，肯定唔想成世屈喺中央陸軍，難得獲球會同國家隊重用，以佢唯我獨尊嘅個性，熱身賽都唔會放過入波機會，配合香川真司、前田遼一同岡崎慎司，足夠玩殘阿聯酋後防。

雖然今野泰幸、內田篤人同栗原勇藏因為要喺緊接對伊拉克嘅外圍賽坐波監，冇入選今次大軍，可能會影響防線穩定性，好在中堅吉田麻也最近由芬洛轉會修咸頓，難免希望畀個好印象領隊，證明自己有能力喺英超立足，對家阿聯酋由奧運隊教練馬哈迪阿里上任後首次領軍，隨時成為祭旗對象，大敗唔出奇。
日本近5戰入13球

‧日本連續5場入波，攻入13球。

‧本田圭佑為日本攻入4球領先射手榜。

‧日本近7場有5次半場領先、2次打和。

‧阿聯酋近3次對賽半場未入過波。
日本超班半場勝抵博

睇好日本贏波，半場贏都係唔錯嘅選擇，事關日本球員控球能力超強，特別係應付亞洲區賽事，簡直有西班牙玩對手嘅感覺，一般貨色唔好話要埋門，幾乎連搓波過半場機會都唔多。對上1次日本上半場失波，已經係上年9月對烏茲別克，基本上唔使擔心佢哋半場落後，加上日本中前場位置競爭激烈，大把新星等上位，相信呢場班正選必定會以最短時間打沉阿聯酋顯身價。