「馬天尼斯效應」引爆拜仁入球騷

猪拉多纳

德甲史上最貴價球員，今晚就會勁爆登場，拜仁慕尼黑喺主場對史特加，當然要捧入球大賀吓佢！搞足成個暑假，拜仁終於以破德甲紀錄4,000萬歐元買起畢爾包中場查維馬天尼斯，雖然呢場佢唔慌會踢得耐，但肯定會引爆隊友戰意，唔係坐冷板點搞呀？搶攻格玩大佢！

（有線61、64及204周日晚11:30直播）

拜仁連續兩季失落聯賽冠軍，高層當然唔滿意，由於佢哋擁有德甲最強火藥庫，即使馬里奧高美斯養傷，仲有文迪蘇傑、洛賓同列貝利負責爆破，所以決定掟錢強搶畢爾包中場查維馬天尼斯，增加中場聯繫能力，佢嘅加盟，相信會激起拜仁球員戰意，爭取表現避免坐冷板，「馬天尼斯效應」唔可以睇小。
史特加伊比斯域夠弗

另一方面，史特加開季前賣走前鋒舒希巴同中場謝赫特，袋咗650萬歐元，但由於財政出現問題，結果搞到零轉會費增兵，借用史浩克04後衞賀蘭，免費簽入哈化柏林翼鋒端尼杜倫就當增兵完成，好在射手伊比斯域夠生性，歐霸盃附加賽對莫斯科戴拿模兩回合勁入3球，帶挈球隊過關，有佢幫手開得出入球騷。