AC新兵輸經驗唔「洛」觀

猪拉多纳

開咧戰落筆打三更嘅AC米蘭，嚟到第2輪就要作客實力分子博洛尼亞，球隊雖然今周先後收購尼安同借入保贊兩個前鋒，但係咪即刻交到貨，實在好難講？始終作客波加上上季兩次交手都贏唔到，力奇睇唔到佢哋有乜可勝之道，AC作客讓波，梗係捧1.77倍「讓球主勝」啦！（開賽時間：周日凌晨2:45）

「紅黑兵團」今季放走多名主力，實力大減，上輪連力奇都以為佢哋仲撐得住，點知對住新升班嘅森多利亞，喺主場都夠膽輸波而回。主帥阿里基賽後死撐話落敗唔關人腳事，只係球隊運氣唔好，力奇實在唔多認同，即使佢哋今周補入兩個年輕前鋒，話就話係活力十足，但同樣經驗不足嗰度慘呢，冇埋地利仲點贏？
博洛尼亞死守打突擊

博洛尼亞首輪都係全失3分，作客基爾禾吞2蛋，不過今鋪返主場出擊，點都會踢番出水準。佢哋近日簽入前鋒費路卡利同中場比斯安沙，都係戰鬥力唔曳，雖則話中場迪亞高佩雷斯同樸坦洛華都要停賽，但只要佢哋肯專心打穩守突擊，憑住地利，都應該可以保住不敗。