韋斯咸 富咸和氣生財

猪拉多纳

今季英超踢咗兩輪，各位朋友都對各隊有咗初步認識，今晚韋斯咸主場迎戰富咸，唔知大家又會點睇呢？「張峰」就覺得兩隊咁高咁大，博3.2倍和波有着數！（有線200及300、廣東體育周六晚7:45直播）

雙方喺英超開季同樣係勝負各一，但講到近況，韋斯咸就冇富咸咁好啦！「錘仔幫」上仗作客史雲斯就發波瘟，全隊踢到冇厘神氣，幾件主將好似路蘭同卡頓高爾踢到無影，而門將積亞基連倫，同埋後衞占士哥連斯就齊齊送禮，搞到最後慘吞三蛋，戰果絕對正路。
兩新兵安祖卡路爾 貝碧鬥法

經過上仗教訓後，領隊艾拿戴斯肯定會鬧醒班球員，尤其係積亞基連倫話晒喺英超立足多年，應唔會畀自己衰多鑊啩？加上又成功向利物浦借用安祖卡路爾，前線火力大增，今日返回主場出擊，知恥近乎勇，應有力同富咸一戰。

另邊廂嘅富咸，上仗雖不敵曼聯，但表現完全對辦，可說雖敗不辱。呢間倫敦球會今季有老將梅菲同前鋒安祖莊臣離隊，取而代之係克羅地亞國腳柏歷、洛達列加同剛由曼聯加盟嘅貝碧托夫，前兩者都已經交到貨，加埋杜夫、軒治蘭特，班底唔差。只要富咸發揮上兩場水準，作客「錘仔幫」雖未至於話穩勝，但唔輸攞1分走應該Ok，「張峰」今場一如買和波，大家跟唔跟呢？
張峰來料：韋斯咸（和）