魔術斯做大「士」

猪拉多纳

曼城今晚喺主場對昆士柏流浪，係咪虎入羊群？小弟唔知，小弟只係知曼城條防線好有問題，既然撞啱「瘦身魔術斯」泰維斯家陣狀態大勇，入得又失得，梗係博中位數3.5球嘅1.95倍入球大啦！（有線200及300、廣東體育周日凌晨0:30直播）

曼城喺歐聯抽籤被編入死亡D組，點算？九月中先踢，到時至算啦，依家都係專注番衞冕英超大業先！曼城雖然有阿古路打柴，不過佢哋條鋒線人才濟濟，瘦身成功嘅泰維斯開季弗到爆，連續3場有波入，家陣「魔術斯」仲唔趁仇家阿古路長抖，乘機博表現搶番個正選咩？
阿古路打柴仲有巴神

除咗泰維斯，「巴神」巴洛迪利同波斯尼亞神箭迪斯高，亦要為自己前途而戰，佢兩個都係質素頂級嘅前鋒，配合拿斯尼同後上王耶耶托尼，想曼城冇波入？根本係難過登天！

可惜吖，曼城條防線一直都搞唔掂，開季連埋社區盾對車路士、英超鬥修咸頓同利物浦都係畀人入波先，仲要每場都係失兩球，絕對唔似有冠軍球隊嘅風範。查實高拉洛夫嘅防守能力早就備受質疑，耶耶又掛住助攻，呢個問題一日唔解決，曼城就只能夠靠喪攻搭夠。
QPR喪攻3件前鋒有料到

對家昆士柏流浪（QPR）喺暑假期間大事增兵，不過買得人多唔代表一定有成績，朴智星、安祖莊臣、保辛華、賴恩尼爾遜、格尼路及羅拔格連等新兵係有名氣，有分量，但佢哋同新埋班冇分別，默契輸蝕，好在呢班波唔識死夠膽喪攻，施斯、森莫亞同格尼路都有獨自搵食嘅能力，有條件隊番曼城一兩粒，既然係咁，呢場波個1.95倍入球大當然捧得過啦！
曼Q都係「大」玩家

‧昆士柏近6次作客曼城贏波單跳，對上一次為不勝。

‧曼城近10次面對QPR獲4勝3和3負，未有壓倒性優勢。

‧曼城近10仗主場、昆士柏流浪近10仗作客同樣開出7大3細。