史雲斯當起炸散新特蘭

猪拉多纳

西班牙足球影響力愈來愈大，英超球隊史雲斯今季推行「西班牙化」非常成功，包括盃賽，已三連勝狂入十一球，有姿勢更有實際。史雲斯已踢起信心，等閒之輩好難抵擋得住佢哋，呢隻「天鵝」今晚主場對新特蘭，只係小讓平半，細鬼認為史雲斯上盤開出機會高。

（有線304及204台周六晚10時直播）
米捷兩場聯賽轟三粒

史雲斯前領隊羅渣士轉教利物浦後，會方搵來丹麥名宿米高盧特立執教，佢球員時代効力過巴塞同皇馬，亦教過兩支西甲球隊基達菲同馬略卡。因此，米高盧特立今季接手做史雲斯主帥，立即羅致幾位西班牙兵，表現相當對辦，中場米捷踢兩場聯賽入三球，非常犀利。

防線上嘅西班牙守將捷高亦有穩定發揮，難怪球隊今季表現攻守兼備。史雲斯呢類中小型球隊，往往靠士氣支撐，佢哋現時踢得咁順，相信仲可以威多一排。至於新特蘭周中英聯盃只係小勝乙組仔摩甘比，球員狀態麻麻，當然要捧當頭起嘅史雲斯。