歐超盃大鬥法

猪拉多纳

歐洲大戰今晚爆發！歐聯冠軍車路士同歐霸盃盟主馬德里體育會，將喺摩納哥上演歐洲超級盃爭奪戰。車仔開季後氣勢如虹，王子費托重現射手本色，今晚倒戈母會肯定盡騷「哥利」。不過馬體會王牌法卡奧同樣狀態巔峰，今勻兩大射手對決啱晒「大盤客」「四眼哥」口味，一於玩晒「半場大」同「入球大」，過癮呀！（有線61及201、中央5台周六凌晨2:45）

車路士喺英超3戰全勝喪入8球，比利時新星夏薩特源源不絕嘅助攻，係其中一大關鍵，喺呢位「新丁」帶動下，連帶費托都全面翻生，唔使再畀人鬧係「廢托」。
馬體會鐵三角煞食

王子家陣喺英超已經入咗2粒，同近一兩季比不知精神咗幾多，而今場對佢亦係意義重大，事關佢01至07年間喺馬體會揚名，依家佢經歷久沉後重振雄風，當然想喺「前度」面前入波兼捧盃威番鋪。領隊迪馬堤奧已經講明今場會精銳盡出，連新加盟嘅鋒將域陀摩西斯，同後衞艾斯派古達都有望披甲。

雖然馬體會牌面或者唔及車路士，但佢哋踢親盃賽就特別醒神。最緊要係佢哋嘅王牌法卡奧入球能力驚人，呢位哥倫比亞射手啱啱喺西甲連中三元，協助球隊怒炒畢爾包4球，佢同阿祖安盧比斯、阿達杜蘭組成嘅進攻鐵三角，論威力喺西甲絕對唔輸蝕畀皇馬同巴塞。
藍戰士泰利停賽

馬體會火力強勁唔在講，最緊要係車路士有中堅泰利停賽踢唔到，法卡奧話唔定就係靠呢個缺口搵到食。今場勝負關乎到邊個先係歐洲冠軍中嘅冠軍，兩隊一開波就埋牙駁火絕對唔奇，期望合演入球騷，半場都開埋大就正喇！
車仔連續3場有12碼

‧兩軍只曾喺09年歐聯對壘，結果兩回合都開大。

‧兩軍最近合共20場比賽有11場開大。

‧車路士連續3場聯賽博得12碼。
法卡奧醒神博馬體會先入波

雖然車路士喺最近3場聯賽都博到12碼，不過去到歐洲賽場又點會咁易吖！而且金童費托同桑馬達都喺西甲打滾過幾年，馬體會一眾後防應該對佢哋相當熟路，車仔要入波邊有咁易？相反馬體會前鋒法卡奧狀態火熱，喺上場聯賽大演帽子戲法，而且佢踢歐洲賽特別醒神，連奪兩屆歐霸盃神射手，今晚一於博2.18倍馬體會先入球！
歐超盃賽制

賽事於中立場舉行，於法定時間內打和將加時30分鐘，再和則以互射12碼決勝。