愛華頓弗爆唔放過甲組仔

猪拉多纳

近況大勇嘅愛華頓，今晚喺英格蘭聯賽盃次圈主場迎戰奧連特，以「拖肥糖」由上季尾延續至今嘅勁勢，有力炒起呢隊甲組仔，雖然1.45倍「讓主」稍熱，但係用嚟做過關膽都唔錯o架！（開賽時間：周四凌晨2:45）

愛華頓領隊莫耶斯限米煮限飯嘅功力，不得不令小妹佩服，事關佢哋曾經衰到連換球場草皮嘅錢都籌唔足，不過上季中買入謝拉域等好貨色後，「拖肥糖」就變得極之難啃，「超級爆炸頭」費蘭尼頂上功夫亦夠晒出色，今季就連續兩場有波入。
奧連特後防主將缺陣

雖然英格蘭聯賽會日前推出新規例，所有非英超球隊，踢英聯盃強制性要出最強陣容，英超球隊就唔受限制，不過小妹覺得愛華頓唔會派太多副選，皆因佢哋放走魯迪維爾、卡希爾同尤保等主將後，主要援兵就只得派拿同米拿拉斯，可以話係焗用同一班主力，好彩現階段只係季初，未有耐踢到殘，撞啱對手奧連特有後防主將古夫拔唔踢得，愛華頓想趁火打劫入多幾球都唔會好難。