國米鋒線執位贏「卡」士

猪拉多纳

好嬲呀！意甲咁多靚仔，有AC、祖記加國米，做咩唔播呀？星期日黃金時間有賽事，你哋竟然唔播，搞乜呀！直播權好貴咩？畀唔起呀？畀唔起所以係咁打電話叫我加錢續約呀？哼！我先唔中計，一於搵Link睇……意甲，西甲就……點都好，唔靠呢個收費電視台！嬲還嬲，小妹都唔會因為咁而放棄意甲，仲做足功課一盡綿力谷行佢，吹咩？今晚升班球隊佩斯卡拉喺主場迎戰國米，小妹撐1.78倍國米客W！

（廣東體育周一凌晨2:45直播）
佩斯卡拉冇踢意甲近20年

大家可能唔多熟悉佩斯卡拉，好，就等小妹介紹下先啦！呢隊波花名叫「海豚」，咁耐以嚟只係踢過意甲5季，對上嗰次已經係93年嘅事喇，雖然佩斯卡拉難得重返頂級聯賽，但佢哋真係窮到喊，只係引入前鋒保捷迪同守將泰利斯，其餘都係用番乙組人腳，咁嘅款頭，邊有運行呀？

對家國米就唔同喇，佢哋除咗留用辛尼迪，仲踢走科蘭、莫路沙拉迪同柏仙尼呢啲唔等使前鋒，換咗卡斯辛奴、加根奴同柏拉斯奧返嚟，鋒力進一步提升，爭標決心極大。可能大家會驚佢哋嚟緊有歐霸盃跟尾，今仗未必盡全力，但其實「藍黑軍」一直想喺歐霸盃「自殺」，上圈作客贏3粒，返主場好畀心機咁失2球畀人，無奈出線，咁踢法，你唔係信國米會留力爭歐霸啩？
微博傳情：陽光海灘，正！

Yeah！出發喇！見報之日，小妹已經身在泰國享受陽光與海灘歎世界，哈！不過咁，小妹上星期收到好多「朋友」嘅問候，佢哋問：「乜你識游水o架！」「算吧啦，你邊夠膽玩刺激嘅嘢吖！」哼！我依家就話過你哋知，我乜都識、乜都敢，有相有真相，遲啲你哋就知，到時唔好再寸我喇！