德甲再起風雲

猪拉多纳

新一季兼第50屆德甲今晚開鑼喇！今晚打頭陣係力爭3連冠嘅多蒙特，喺主場迎戰雲達不來梅。「蜜蜂兵團」今夏放走咗中場核心香川真司，雖然補充嘅馬高列奧斯都有番咁上下，但整體戰力未見加強。反而不來梅季前大換血後效果顯著，季前熱身就試過打和多蒙特，今場受讓一於捧3.95倍「讓客」！（有線61、64、201及204、中央5台周六凌晨2:30直播）

德國足總1962年喺多蒙特宣布成立德甲聯賽，首個球季就係63/64球季，依家相隔50年又重返多蒙特開波，呢個歷史性一刻，阿占當然唔想錯過。事實上，德甲喺呢50年間發展迅速，上季全德甲嘅營業額仲突破20億歐元大關，最緊要係佢哋唔止搵到錢，水準亦不斷提升中，上季平均每場有近3個入波睇，自然深獲球迷支持。
多蒙特「食老本」不思進取

講番場波，多蒙特連續兩年稱霸德甲，已經取代拜仁成為眾矢之的。今季先後有巴里奧斯同香川真司分別過檔中超同曼聯，替補嘅就係舒希巴同馬高列奧斯，都係一對一咁換，依家問題係多蒙特威咗兩年後，只係諗住守江山而唔求更進一步，今季遇到嘅挑戰肯定更大，何況右閘比薛斯基响練波嗰陣整傷右邊大髀，想變都冇乜本錢。
新班底熱身賽和多蒙特拜仁

不來梅曾幾何時都係德甲頂級勁旅，但近年愈踢愈霉，今個暑假就痛定思痛，將走下坡嘅前鋒比沙路、守將拿杜同態度有問題嘅中場馬高馬連等人掟走，引入荷蘭翼鋒艾利亞、希臘後衞柏柏斯達夫普路斯同捷克右閘謝比施拿斯等年輕球員，即刻立竿見影。今個月初熱身賽就曾經同多蒙特同拜仁打成平手，證明換血有一定成效，今場有力立於不敗之地。
頂占筍盤：雲達不來梅（讓球客勝）

雙方交手旺開細

‧近4季聯賽對碰開出2大6細。

‧近18次聯賽交手，不計算主客勝負，共開出4次「1:0」及7次「2:0」波膽。

‧近9個球季，兩軍於聯賽對碰只得2場和波。
信往績吼實2:0、0:2波膽

翻查數據，多蒙特與不來梅自03/04年起，聯賽18次對碰曾開出7次「2:0」波膽，比率接近39%。信往績先選「2:0」及「0:2」波膽。而不來梅於早前舉行嘅電訊盃面對多蒙特及熱身賽面對阿士東維拉最終都同樣打成「3:3」平手，呢期呢個波膽咁旺一於扒冷要多注。